Noyabrın 15-də Bakı Ağır Cinayətlər Məhkəməsində hakim Samir Əliyevin sədrliyi ilə keçirilən prosesdə AXCP üzvü Aqil Hümbətov 10 il azadlıqdan məhrum edilib. 

10 noyabrda keçirilən məhkəmə iclasında dövlət ittihamçısı deyib ki, Hümbətovun yaşadığı Zirə qəsəbəsində Yəmən Məmmədov adlı şəxsə bıçaqla xəsarət yetirməsi məhkəmədə sübuta yetirilib. O, Aqil Hümbətovun 10 il azadlıqdan məhrum edilməsini istəyib.

Aqil Hümbətov isə prokurorun çıxışına etiraz edərək heç kimi bıçaqlamadığını, Y.Məmmədovun onu həbs etmək məqsədilə hazırlanan planı icra etdiyini - özünə xəsarət yetirdiyini deyib.

AXCP fəalı bu il avqustun 11-də Bakının Zirə qəsəbəsində Yəmən Məmmədov adlı şəxsə bıçaqla xəsarət yetirməkdə ittiham olunur.

Hümbətova qarşı Cinayət Məcəlləsinin 126.2.4-ci maddəsi ilə (ümumi təhlükəli üsulla, xuliqanlıq niyyətilə qəsdən sağlamlığa ağır zərər vurma) cinayət işi açılıb və barəsində Xəzər Rayon Məhkəməsinin qərarı ilə 4 ay həbs-qətimkan tədbiri seçilib.

AXCP fəalı bundan öncə 2019-cu il martın 14-də saxlanılaraq 30 sutka inzibati həbsə məhkum edilib.

AXCP onun saxlanılmasına sosial şəbəkələrdə prezident İlham Əliyevə müraciətinin səbəb olduğunu bildirib.

Bakının Zirə qəsəbəsinin sakini olan Hümbətov deyib ki, işsizdir və üç uşaq böyüdür, yerli hakimiyyət onun problemləri ilə məşğul olmur, buna görə o, zibilliklərdə karton yığıb satmaqla pul qazanmaq məcburiyyətindədir.

Bundan sonra Hümbətov 2020-ci ilin aprelində və iyununda Bakının Maştağa qəsəbəsində yerləşən 1 saylı Respublika Psixiatriya Xəstəxanasına yerləşdirilib.