Ailəsi: ''Ürək nahiyəsində ciddi ağrıları var''

Həbsdəki satirik-şair Tofiq Həsənlinin səhhətində problemlərin olduğu bildirilir.

Məlumatı Meydan TV-yə şairin ailə üzvləri verib.

Bildirilir ki, 6 saylı Cəzaçəkmə Müəssisəsində saxlanan satiriklə telefonla danışıblar.

“Tofiqin səhhətində problemlər yaranıb. Onun kəskin ağrıları olur. Ürək nahiyəsində ciddi ağrıları var. Əl-ayağında qıcolmalar baş verdiyini deyir. Böyrəyin də şikayətlənir, onu incitdiyini söyləyir”,- ailəsindən deyiblər.

Ailə üzvlərinin sözlərinə görə, T.Həsənlinin müalicə və müayinə edilməsinə ehtiyac var və bunun üçün gərəkli addımları atacaqlar.

Satirik şairi Tofiq Həsənli 2016-cı il, avqustun 22-də qanunsuz narkotik dövriyyəsi ittihamı ilə 6 il azadlıqdan məhrum edilib. Onun apelyasiya və kassasiya şikayətləri də təmin olunmayıb.

T.Həsənli KİV-də hakimiyyətin və dövlət məmurlarının ünvanına tənqidi pamfletləri ilə tanınır.

2005-ci ildə də o, narkotikə görə üç il azadlıqdan məhrum edilib. Amma 2007-ci ildə amnistiya ilə azadlığa buraxılıb.

T.Həsənli “Facebook” və “Youtube” hesablarında satiralarını yaymağa davam edib. 2015-ci ilin yanvarında, o, həbslə hədələndiyini bildirib, oktyabrda isə saxlanıb. Buna qədər onun xaricdən yayımlanan “Azərbaycan saatı” proqramında tənqidi şeirləri oxunurdu.