«Cümhuriyyəçilərimizin mayın 28-də İstiqlal küçəsindən başlayaraq keçirdikləri yürüş bugünkü Azərbaycan cümhuriyyətinin fəxridir».

«Respublikaçı Alternativ» (REAL) Partiyasının həbsdəki sədri İlqar Məmmədovun 28 May - Respublika Günü yürüşündən sonra partiyanın bir neçə fəalının həbsi ilə bağlı açıqlamasında belə yazılır. Açıqlamanın mətnini partiya yayıb.

İ.Məmmədov vurğulayıb ki, dinc, bütün sivil normalara və etik qaydalara uyğun keçirilən bayram yürüşündən sonra bir neçə cümhuriyyətçinin həbsi hakimiyyətin mənəvi olaraq zəif olduğunu göstərir.

«Həbslərin yürüş günü deyil, bir gün sonra həyata keçirilməsi onu göstərir ki, əslində dinc toplaşmaq məsələsində problem heç də polisin davranışı deyil. Polis tamamilə normal şəkildə bu prosesi tənzimləyib. Sadəcə olaraq, İlham Əliyev bu bayram tədbirinin miqyasını və ruhunu görəndən sonra hüquq-mühafizə orqanlarına orada iştirak edən insanların cəzalandırılmasını tapşırıb», - REAL Partiyasının sədri yazıb.

İ.Məmmədov qeyd edib ki, Azərbaycanda sərbəst toplaşmaq azadlığı ilə bağlı məhdudiyyət birbaşa polisdən qaynaqlanmır.

«Bu, İlham Əliyevin siyasi paxıllığından irəli gəlir», - deyə REAL Partiyasının sədri vurğulayıb.

REAL Partiyasının həbsdə olan sədrinin bu açıqlamasına Prezident Administrasiyasının rəsmilərindən münasibət almaq mümkün olmayıb. Ancaq istər dövlət başçısı İ.Əliyev, istərsə də başqa rəsmilər bundan əvvəl dəfələrlə bəyan ediblər ki, Azərbaycanda sərbəst toplaşmaq azadlığı təmin edilir.