Prezident İlham Əliyev siyasi və məhkəmə-hüquq sahəsində islahatların olacağını anons edib. "İslahatlar dərinləşəcək. İslahatlara alternativ yoxdur. Siyasi islahatlar, iqtisadi islahatlar, sosial sahədə islahatlar, məhkəmə-hüquq sistemində islahatlar - artıq müvafiq göstərişlər verilib və sənədlər paketi hazırlanır - təhsil, səhiyyə sahələrində, hər bir sahədə, Azərbaycan yeni dövrə qədəm qoyub. Azərbaycan yeniləşir, Azərbaycan güclənir və müasirləşir", - prezident İ.Əliyev martın 20-də Novruz bayramı münasibətilə xalqa videomüraciətində deyib. Onun sözlərinə görə, bundan sonra Azərbaycan yalnız və yalnız inkişaf və tərəqqi yolu ilə gedəcək, vətəndaşların sosial vəziyyəti ildən-ilə yaxşılaşacaq. Qeyd edək ki, bu, İ.Əliyevin Novruz bayramı münasibətilə xalqa ikinci təbrikidir. Martın 18-də prezidentin xalqa qısa müracətinin mətni yayılıb.