ABŞ Mərkəzi Kəşfiyyat İdarəsinin (MKİ) məxfi proqram çərçivəsində ABŞ-da Ukrayna xüsusi əməliyyatçıları və kəşfiyyatçılarına xüsusi təlim keçdiyi iddia olunub. Bildirilib ki, bu proqramdakı ukraynalı əsgərlər Rusiyaya potensial müdaxilə halında mühüm rol oynaya bilərlər. Yahoo! News-a müsahibə verən beş keçmiş ABŞ kəşfiyyatı və milli təhlükəsizlik rəsmisinin sözlərinə görə, proqram 2015-ci ildə başlayıb. Proqramda iştirak edən ukraynalılara ABŞ-ın cənubundakı adı açıqlanmayan obyektdə təlim keçdikləri bildirilib. Məlumata görə, Mərkəzi Kəşfiyyat İdarəsinin Quru Əməliyyatlar Departamentində çalışan paramilitarlar tərəfindən idarə olunan proqram 2014-cü ildə Rusiyanın Krımı ilhaqından sonra Barak Obama dövründə başlayıb və daha sonra Donald Trampın dövründə inkişaf etdirilib. Mənbələr bildiriblər ki, 2015-ci ildən etibarən MKİ-nin bu paramilitarları Şərqi Ukraynada cəbhəyə gedib və oradakı həmkarlarına məsləhət dəstəyi veriblər. ABŞ rəsmiləri MKİ-nin təlim proqramının hücum məqsədi daşımadığını bildiriblər. Hazırkı bir kəşfiyyat rəsmisi proqramın əsasən “kəşfiyyat məlumatlarının toplanmasına” yönəldiyini iddia edib. Yahoo! News proqramın iğtişaşlara hazırlıq üzrə təlim vermək məqsədi daşımadığını, lakin təlimlərdə keçirilənlərin bunun üçün də istifadə oluna biləcəyini bildirib. Kiyev 2014-cü ildən, Krımın Rusiyaya ilhaq edildiyi vaxtdan bəri ölkənin Rusiya ilə sərhədinin iki rayonunda separatçılara qarşı mübarizə aparır. Müharibə zamanı 13 min insan həyatını itirib. Kiyev Rusiyanın separatçılara hərbi dəstək verdiyini bildirsə də, Moskva bu iddiaları rədd edir. Digər tərəfdən, Kiyev və Qərb ölkələri Rusiyanın sərhəddə 100 minə yaxın əsgər topladığını və Ukraynanı işğal etməyə hazırlaşdığını iddia edir.