ABŞ dövlət qulluqçularının ailələri “ Rusiyanın Ukrayna ilə sərhəd yaxınlığında qeyri-adi və narahatedici hərbi fəaliyyəti” səbəbindən Belarus Respublikasını tərk edirlər. Bu barədə ABŞ Dövlət Departamentinin saytında dərc edilmiş məlumatda deyilir. “2022-ci il yanvarın 31-də Dövlət Departamenti ABŞ hökumət işçilərinin ailə üzvləri üçün ölkəni tərk etməsi barədə tapşırıq verib”, - sənəddə deyilir. Həmçinin qeyd edilir ki, Belarusda olan və ya bu ölkəyə səfər etməyi düşünən Amerika vətəndaşları vəziyyətin gözlənilməz olduğunu və regionda gərginliyin artdığını bilməlidirlər. Dövlət Departamenti vəziyyətin qeyri-sabitliyini nəzərə alaraq Belarusa səfər etməməyi “qətiyyətlə tövsiyə edir”. Vurğulanır ki, Belarus hökumətinin səfirlik əməkdaşlarına qarşı həyata keçirdiyi tədbirlərə görə, ABŞ hökumətinin Belarusdakı Amerika vətəndaşlarına rutin və ya təcili yardım xidmətləri göstərmək imkanları məhduddur. ABŞ Səfirliyi regionda siyasi və hərbi gərginliklər səbəbindən yüksək məlumatlılıq və sayıqlıq nümayiş etdirməyin zəruriliyini xatırladır, kütləvi nümayişlərdən qaçmaq və fövqəladə hallar zamanı mümkün gediş planlarını mütəmadi olaraq nəzərdən keçirməyi tövsiyə edir. Bir həftə əvvəl ABŞ Dövlət Departamenti diplomatlara və onların ailələrinə Ukraynanı tərk etməyi əmr etmişdi. Xarici İşlər Nazirliyi həmçinin ABŞ-ın bir sıra digər dövlət qulluqçularının könüllü getməsinə icazə verib.