Hesablama Palatası Bakı metrosunun subsidiyadan təyinat üzrə istifadə etmədiyini aşkarlamışdı

İllərdir maliyyə hesabatlarının auditdə olduğunu əsas gətirərək dərc etməyən “Bakı Metropoliteni” QSC Asiya İnfrastruktur İnvestisiya Bankından kredit alır.

Bu barədə məlumat Metropolitenin satınalmalarla bağlı bildirişində qeyd olunub. Bildirilib ki, kredit “Bakı şəhərində və ətraf ərazilərdə nəqliyyat infrastrukturunun təkmilləşdirilməsinə dair 2025–2030-cu illər üçün Dövlət Proqramı”nın icrası ilə bağlı alınır.

Ancaq alınacaq kreditin məbləği açıqlanmayıb. Ümumiyyətlə son 4 ildə “Bakı Metropoliteni”nin hardan nə qədər vəsait alması və onun nə qədərinin hansı istiqamətlər üzrə istifadə olunmasına dair heç bir məlumat yoxdur, çünki qurum maliyyə hesabatlarını açıqlamır.

Qurumun rəsmi saytının hesabatlar hissəsinə baxdıqda məlum olur ki, sonuncu dərc olunan hesabat 2020-ci ilin 31 dekabrına qədər olan müddəti əhatə edir.

Mülki Məcəllənin 99 və 100-cü maddələri illik maliyyə hesabatlarını hamının tanış olması üçün dərc etməyi dövlət şirkətləri üzərinə vəzifə olaraq qoyur. Ötən 4 il ərzində “Bakı Metropoliteni”nə milyonlarla manat dövlət vəsaiti ayrılıb, satınalmalar keçirilib, gediş haqqı artırılıb. Hesabatların olmaması isə ayrılan vəsaitlərin şəffaflığı ilə bağlı suallar yaradır.

“Bakı Metropoliteni” QSC-nin mətbuat xidmətinin rəhbəri Bəxtiyar Məmmədov “Abzas Media”nın bir neçə sorğusuna cavabda illərdir dərc edilməyən hesabatların auditdə olmasını əsas gətirib.

Qurum 2024-cü ilin martında göndərilən sonuncu sorğunu cavabsız qoyub.

“Abzas Media”nın dövlət satınalmaları üzə monitorinqləri zamanı da “Bakı Metropoliteni” QSC ilə bağlı şübhəli məqamlar üzə çıxıb. Belə ki, "Bakı Metropoliteni" QSC monitorinqlərin əhatə etdiyi 3 ay ərzində 4.689.183,20 (dörd milyon altı yüz səksən doqquz min yüz səksən üç manat iyirmi qəpik) dövlət vəsaitinin bir mənbə metodu tətbiq etməklə, 3.700 (üç min yeddi yüz) manat dövlət vəsaitini isə birbaşa satınalma metodu tətbiq etməklə tender keçirmədən xərcləyib.

Bundan əlavə, Hesablama Palatasının 2025-ci ilin yanvarında dərc etdiyi məlumatlardan aydın olub ki, Palata da “Bakı Metropoliteni” QSC-də problemlər aşkarlayıb. Məlum olub ki, metropolitenin əsas fəaliyyət üzrə gəlirləri xərcləri 13,5 milyon manat üstələsə də, dövlət subsidiyalarının bir hissəsinin investisiya xərclərinə (əsaslı təmir və tikinti) yönəldilməsi maliyyə idarəçiliyində ziddiyyətlərə səbəb olub.