Aprelin 1-də “Abzas Media”nın həbsdə olan jurnalisti Nərgiz Absalamova məhkəmədə sərbəst ifadə verib. Jurnalist bildirib ki, İlham Əliyev jurnalistləri saxta ittihamlarla həbs etdirməklə, ölkədə azad medianı susdurmağa çalışır və 1 ildən çoxdur məhz onun sifarişi ilə təcridxanada saxlanılırlar.

Nərgiz Absalamovanın sərbəst ifadəsini olduğu kimi təqdim edirik: 

"Əvvəlcə onu deyim ki, hamıya aydın olduğu kimi bizim həbsdə olmağımızın nə qaçaqmalçılıqla, nə də kağız yığınında yazılan digər cinayət işləri ilə hər hansısa bir əlaqəsi var.

Biz jurnalist olduğumuz, həqiqətləri üzə çıxardığımız, İlham Əliyev, onun ailə şirkətlərinin, onun təyin etdiyi məmurların korrupsiya əməllərini ifşa etdiyimiz üçün, araşdırmalarımıza görə həbs edilmişik.

Həm də ona görə təcridxanadayıq ki, Gədəbəyin Söyüdlü kəndində zəhərli maddənin - sianidin suya axıdılmasına etiraz edənlərin, buna görə zorakılıq görən, həbs edilən vətəndaşların, gözünə gözyaşardıcı qaz vurulan, döyülən yaşlı qadınların dərdini ictimaiyyətə çatdırdıq.

Həmin vaxt kəndə giriş qadağan idi. Kənddən xəbərləri “qaçaq yollarla” cəmiyyətə çatdırırdıq. Biz olsa-olsa, xəbər qaçaqmalçılarıyıq. Biz Saatlıda içməli su tapmayan, buna etiraz etdiyi üçün rezin gülləyə, zorakılığa, sutkalıq həbslərə məruz qalan vətəndaşların səsini eşitdirdik.

Məcbur diləndirilən uşaqları, zibillikdən dəmir yığıb sataraq dolanan, heç kimin görmədiyi Telmanı göstərdik. Biz həm də göstərdik ki, tarixi abidələrə həssas yanaşdığını deyən prezident ailəsi öz otellərinin avtomobil dayanacağı üçün tarixi binanın yarısını heyfslənmədən sökə bilir. Bu səbəblərə görə, artıq 1 ildən çoxdur ki, İlham Əliyevin sifarişi ilə təcridxanada saxlanılırıq.

Biz həm də qanunsuz fəaliyyətdə ittiham olunuruq. Necə ki, 2013-cü ildə QHT-lər haqda qanunu dəyişib, bu dəyişiklikdən sonra onlara qarşı repressiya başladıldısa, eyni şey indi azad mediaya qarşı baş verir. Bir neçə il öncə bu qanunu da dəyişib daha irtica bir qanunla əvəzlədilər. İndi də bu irtica qanundan istifadə edib azad mediaya - bizə qarşı repressiya həyata keçirirlər. Qanunilik, qanuni fəaliyyət belə olmur. Keyfi olaraq dəyişən, repressiya alətinə çevrilən heç bir qanun ali deyil, legitim deyil. Bu gün bizdən ittiham tərəfi reyestr soruşur. Yeni irtica qanunla qəbul etdikləri icazəli media yaratmaq cəhdini qanuniləşdirməyə çalışırlar. Söhbət o qanundan gedir ki, Azərbaycanın sözdə tərəfdaş olduğu insan haqları təşkilatları, beynəlxalq qurumlar dəfələrlə bu qanununun azad medianı boğma cəhdi olduğunu bildiriblər. Hətta Venesiya Komissiyasının bu haqda rəyi də mövcuddur. Ona görə də indi bizi qanunsuz fəaliyyətdə ittiham edənlərə demək istəyirəm ki, bizi repressiyalara alət etmək üçün dəyişdiyiniz qanunlarla şərləyə bilməzsiniz. Biz universal prinsiplərin, ifadə və media azadlığının mövcudluğunu qorumağa çalışırıq və buna davam da edəcəyik.

İlham Əliyev ölkəni inkişaf ettirmək, irəli aparmaq əvəzinə geriyə 1937-ci ilə qaytardı. Bəli, Azərbaycan indi 1937-ci illər repressiyasını yenidən yaşayır. Kitablarda oxuduğumuz, oxuduqca ətimizin ürpərdiyi o sətirləri indi biz özümüz yaşayırıq. Doğru söz deyən, yazan, araşdırmalar edən, səsini çıxaran, müstəqil media ilə əlaqəsi olan hər kəs həbs olunur. Evlərinə basqın edilir, yoldan oğurlanır. 

Siyasi məhbuslara zorakılıq edənlər təltif olunur, təşəkkürnamə alır. Etiraz edənlər döyülür, işgəncə görür, onlara elektroşok verilir. Hətta polisi tənqid edənlər belə bu münasibətlə üzləşirlər. Bircə onda şansımız gətirib ki, biz ən azından bu yaşda güllələnməyəcəyik. Təkcə müstəqil media yox, yandaş media da həmin dövrü yaşayır.

1937-nin “Kommunist”, “Ədəbiyyat” qəzetini indi “Real TV”, “Baku TV”, “AzTV” və digər biabırçı televizya kanalları əvəz edir. Eyni həmin dövrdə olduğu kimi indi də bizi bu medialar “casus”, “xain”, ”inqlabçı”, “qərbin maşası” adlandırır. “Real TV”, “Baku TV”, “AzTV” kimi kanallar İlham Əliyevin uğursuz siyasətinin nəticəsini “ölkəmizi pis tanıdırlar”, “qarayaxma edirlər” deyib bizim üstümüzə yıxmağa çalışırlar.

Biz nə xainik, nə casus, nə maşa, nə də inqilabçıyıq. Biz jurnalistik. Fəxrlə deyirəm, olmalı olduğu kimi jurnalist. Yaltaqlanmadan, təbliğat, təşviqat aparmadan, sadəcə doğruları çatdıran, həqiqəti araşdırıb tapan jurnalistlər. Etməli olduğumuzu edirik.

Artıq hamıya aydındır ki, İlham Əliyevə görə azad jurnalist olmaq, araşdırma etmək cinayətdir. O istəyir ki, bütün jurnalistlər Mirşahin kimi, onun işçiləri kimi sadəcə ona tərif yağdırsın, ona əvvəlcədən yazılmış, razılaşdırılmış sualları versin və axırda da yanında durub xatirə şəkli çəkdirsinlər. Bəs bu nəyin xatirəsidir? Xalqa xəyanətin, hökümətə sədaqətin xatirə şəklidir.

Hökümət istəyir ki, həqiqət deyilməsin, bu ölkə, burada baş verənlər bağlı qapılar ardında qalsın. Azad media əməkdaşı ona görə azadlıqdan məhrum edilib ki, o qapılar açılmasın. Biz o qapıları açmağı bacarmışıq. Biz o qapıların nəfəsliyi olmuşuq. Və o nəfəsliyin bağlanmaması üçün əlimizdən gələni edəcəyik.

Tarix boyu azad söz uğrunda çox qurban vermişik. İndi isə sırada bizik və sayımız hələ də artmaqda davam edir. Amma əminəm ki, bu qorxunc dövr də bitəcək. Jurnalistikanın təhlükəli olmadığı, jurnalistlərin təqib olunmadığı bir səhərə oyanacaq Azərbaycan!"

Nərgiz Absalamova, 1 aprel 2025-ci il