Beynəlxalq idman qurumları Azərbaycanın təqdim etdiyi şikayətdən sonra Ermənistanı təmsil edən cüt fiqurlu konkisürənlərin proqramında istifadə olunan musiqinin “Artsax” adlı titulunu rəsmi Olimpiya sənədlərindən çıxarıb. 

“The Guardian”ın yazdığına görə, məsələ XXV Qış Olimpiya Oyunlarının fiqurlu konkisürmə yarışları ərəfəsində gündəmə gəlib. Ermənistan cütlüyü Karina Akopova və Nikita Raxmaninin qısa proqramını erməni bəstəkar Ara Gevorqyanın “Artsax” əsəri ilə təqdim etməsi planlaşdırılıb. Azərbaycan tərəfi isə “Artsax” adının Olimpiya platformasında siyasi məna daşıya biləcəyini bildirərək, Olimpiya Xartiyasındakı siyasi neytrallıq prinsipinə zidd sayıldığını əsas gətirib.

“Olimpiya Oyunları xalqlar arasında sülhün, dostluğun və qarşılıqlı hörmətin simvoludur. Bu platformadan siyasi və separatçı təbliğat məqsədləri üçün istifadə etmək yolverilməzdir”, - Azərbaycan Milli Olimpiya Komitəsinin  açıqlamasında bildirilib.

Şikayətdən sonra Beynəlxalq Olimpiya Komitəsi (BOK) və Beynəlxalq Konkisürmə İttifaqı (ISU) məsələni nəzərdən keçirib və musiqinin rəsmi materiallarda təqdimat formasını dəyişməyə razılaşıb. Nəticədə tədbir cədvəlləri və sənədlərdə proqram artıq “Artsax” kimi göstərilmir, “Ara Gevorqyanın musiqisi” (“Music by Ara Gevorgyan”) kimi qeyd olunur.

Qərar erməni idmançıların həmin kompozisiya ilə çıxış etməsinə qadağa qoymur. Akopova və Raxmanin yarışda iştirakını saxlayır: cütlüklərin qısa proqramının fevralın 15-də, sərbəst proqramın isə fevralın 16-da təqdim olunacağı bildirilir.

Bununla belə, dəyişiklik yeni tənqid dalğası yaradıb. Tənqidçilər bildirirlər ki, müdaxilə çıxışın özünə deyil, musiqinin adına yönəlib və qayda pozuntusu sübut edilmədən əsərin adı rəsmi qeydlərdən “silinib”, melodiya isə qalır. Onların fikrincə, bu yanaşma beynəlxalq səhnədə erməni mədəni özünüifadəsini zəiflətmək cəhdi kimi görünür.

Olimpiya təşkilatçıları və idarəedici qurumlar isə qərarı idmanın siyasi mübahisələrdən kənarda saxlanması cəhdi kimi izah edir. Bu halda kompozisiyanın yarışdan çıxarılması deyil, yalnız rəsmi sənədlərdə necə adlandırılması məsələsi ön plana çəkilib.

Qeyd olunur ki, proqram 0yunlar başlamamışdan öncə də sosial mediada geniş yayılıb və cütlüyə əlavə diqqət gətirib. Karina Akopova daha əvvəl “Artsax” musiqisi ilə çıxış etməyin onun üçün şəxsi məqsəd olduğunu, Ermənistanı təmsil etməyin qürurunu və proqramın kimliyi ilə bağlı emosional məna daşıdığını söyləyib.