Çərşənbə günü ABŞ-da Enerji İnformasiya İdarəsinin (EIA) açıqlayacağı neft ehtiyatları göstəricisinin, ötən həftə 1.2 milyon barrel aşağı düşməsi gözlənilir. 

Digər tərəfdən, Liviyanın neft hasilatı, "Wintershall AG"-nin ən az iki sahədə istehsala yenidən başlaması ilə əlaqədar olaraq son dörd ilin ən yüksək səviyyəsinə çatıb. ABŞ-da da neft istehsalı artır. Bu, Neft İxrac Edən Ölkələr Birliyi (OPEK) və tərəfdaşlarının hasilatlarını azaltmalarının müsbət təsirini silir.

Analitklər bildirirlər ki, yüksək ehtiyatlar və artan hasilat, neft qiymətlərinin dayanaqlı yüksəlməsi üçün əngəl yaradır. Həmçinin 45 dollar ətrafındakı qiymətlər, ABŞ-da istehsalın yenidən azalmasına kömək edə bilər. Bakı vaxtı ilə saat 07:50-yə olan məlumata görə, Qərbi Texas nefti (WTI) Nymex birjasında 44.19 dollardan, Brent nefti Londonda ICE Futures Europe birjasında  46.99 dollardan alıcı tapıb.

Nazir: IV rübdə neft bazarında tarazlıq yaranacaq

"Neft bazarı düzgün istiqamətdə irəliləyir. Lakin onun tarazlanması üçün zaman lazımdır". Bu açıqlamanı Səudiyyə Ərəbistanının energetika naziri Xalid əl-Falih Londonda yerləşən "Asharq al-Awsat" qəzetinə verib.

"Hesab edirəm ki, fundamental bazar amilləri doğru istiqamətdə irəliləyir. Amma, son illərdə yığılan artıq neft ehtiyatları səbəbindən aldığımız qərarın effektivliyi üçün zaman lazımdır. Cari proqnozlar şist neft hasilatını da nəzərə alaraq onu deməyə imkan verir ki, ilin son rübündə tarazlıq bərpa olunacaq", - deyə nazir qeyd edib.

Bundan əvvəl tarazlığın 2017-ci ilin ortalarında yaranacağı bildirilmişdi.

X.əl-Falih Liviya və Nigeriyadakı hasilat artımının OPEC-in hasilatın azaldılması ilə bağlı qərarına təhlükə yaratmayacağını bildirib. Qeyd edək ki, Liviya və Nigeriyada hasilatın artması səbəbindən mayda OPEC-in hasilatı 336 min barel/gün artım göstərib.