“Tərtər işi” ilə bağlı 19 nəfər azadlığa buraxılıb

"Xəbəri eşidəndə yoldaşımla sevincdən ağladıq, göz yaşı tökdük. Mənim təzyiqim qalxdı, pis vəziyyətə düşdüm. Mən ümid edirdim ki, mənim balamın günahı yoxdur, nə vaxtsa öz evinə qayıdacaq"- Tərtər hadisələrinə görə 5 il  6 ay həbs cəzası çəkdikdən sonra bu gün azadlığa çıxan MAXE Zaur Abdullayevin anası Təranə Abdullayeva deyir.

"Tərtər işi" ilə bağlı məhkum olunan 19 nəfər bu gün azadlığa buraxılıb. Bu barədə Baş Prokurorluq məlumat yayıb. 

Həmin şəxslərin dövlətə xəyanət ittihamı və digər epizodlar üzrə təqsirlilikləri sübuta yetirilmədiyindən cinayət təqibinə bəraətverici əsaslarla xitam verilməsi haqqında qərarlar qəbul edilib və barələrində seçilmiş həbs qətimkan tədbiri ləğv edilməklə azadlığa buraxılıblar.

Bundan başqa, istintaq zamanı həyatını itirən  Mehman Hüseynov və Elxan Ağazadənin barələrindəki cinayət təqibinə bəraətverici əsaslarla xitam verilib. 

Təranə Abdullayeva deyir ki, gec də olsa, ədalətli qərar oldu. Amma ədalətin tam bərpası üçün o, bu cinayət işində təqsiri olanların cəzalandırılmasını istəyir: 

"Mənim oğlumun ayaq və əl dırnaqlarını, dişlərini çəkiblər. Elektrik cərəyanı veriblər. Komada qalıb bir neçə gün, aparıb ölü damına atıblar. Bir də ayılanda görüb ki, ölü damındadır. Mənim uşağım danışıq qabiliyyətini itirib. Tam danışa bilmir. Dili tutulub, bir neçə gün danışa bilməyib. Günahkar olanlar - Şəfayət İmranov, Xanlar Vəliyev, Nəcməddin Sadıqov, Hikmət Həsənov, müstəntiqlərdən Emin Əliyevdir. Tək mən yox, bütün valideynlər istəyirik ki, bizim uşaqlarımıza bu cəzanı verənlər özləri cəza çəksinlər".

Bu evin ikinci oğlu da Tərtər hadisələri zamanı işgəncəyə məruz qalıb. Valideyn deyir ki, ilk işi onların sağlamlığını bərpa etməkdir: 

"Mənim o biri oğlum Rauf Abdullayev də Tərtər hadisələrinin qurbanı olub. Bu dəqiqə o da pis vəziyyətdədir. Ona da 14 gün işgəncə veriblər, pis günə salıblar. Elektrik verib ciyərini partladıblar. Bu dəqiqə də evdədir, xəstədir, müalicə alır. Dünən həkimə aparmışdım, həkim resept yazdı, amma onu almağa imkanım yoxdur. Mən vətən üçün iki bala verdim ki, getsin vətənə qulluq etsin, Azərbaycan xalqına xidmət eləsin. Axırda da balalarımın sağlamlığını itirib mənə verdilər. Hökumətdən ancaq balamın sağlamlığını geri qaytarmalarını tələb edirəm"- Təranə Abdullayeva deyir. 

5 il həbs cəzası çəkdikdən sonra azadlığa buraxılan əsgər Emil Əliyevin atası Abdulnasir Əliyev AbzasMedia-ya deyir ki, zərərçəkənlərin yenidən dindirilməsi prosesi, işgəncələrin araşdırılması qərarın bu qədər gec verilməsinə təsir edən amillərdəndir:

“Çox ağır işgəncələr idi. Dırnaqları çəkilib, elektrik enerjisinə qoşulublar. Düzdür, Emildə bu işgəncələr olmayıb. Emilə sadəcə yumruq, təpik, sillə vurublar. Elektrikdən istifadə olunmamışdı və dırnaqları çəkilməmişdi. Amma digərlərinin hamısında bu hallar var idi. İşgəncələr sübut olunduqdan sonra zərərçəkənlərin təqsirsizliyi məsələsi gündəmə gəldi. Onun da araşdırılması bu qədər vaxt apardı". 

Emil Əliyevin valideyni əlavə edir ki, övladının və zərərçəkən hər kəsin başına gətirilən bu dəhşətli hadisələrə görə Müdafiə Nazirliyi və Hərbi Prokurorluq, həmçinin ekspert rəyləri verən həkimlər məsuliyyət daşıyır. 

A.Əliyev zərərçəkənlərin günahsız olaraq həbs cəzası çəkdiklərinə görə hökumətdən təzminat tələb edəcəklərini deyir. 

Vəkil Rəsul Cəfərov AbzasMediaya bildirib ki, bu işin yenidən araşdırılmasına 2021-ci ilin dekabrında başlanılıb. Təxminən 1 ilə yaxın araşdırmadan sonra hərbi qulluqçulara bəraət verilərək azadlığa buraxılıblar: 

“Bu şəxslərə qarşı vaxtilə, yəni 2017-ci ilin may-iyun aylarında ittiham irəli sürən hərbi prokurorluq və sonradan ittiham hökmü çıxaran məhkəmələr ciddi pozuntulara yol veriblər. Onların pozuntuları yalnız zərərçəkən şəxslər və onların ailə üzvlərinin davamlı müraciət və etirazlarından sonra ortaya çıxdı və bu, təxminən 5 ilə yaxın vaxt keçdikdən sonra baş tutdu. Həmin pozuntuların gizlədilməsi ilə bağlı təqsirkar şəxslər tərəfindən də addımlar atılıb ki, bu da uzun vaxt tələb olunmasına səbəb ola bilər”.

R.Cəfərov bildirib ki, zərərçəkənlərin ölkə qanunvericiliyinə görə dövlətdən kompensasiya tələb etmək hüququ var.

Vəkil əlavə edib ki, Tərtər hadisələri ilə bağlı təxminən 12-13 nəfərin işi vaxtilə Avropa Məhkəməsinə göndərilib, amma həmin işlər üzrə heç bir kommunikasiya başlamayıb.

2016-cı ilin aprel döyüşlərindən sonra cəbhənin Tərtər istiqamətində hərbi qulluqçuların böyük bir qrupu həbs olunaraq istintaqa cəlb edilib.
Daha sonra Baş Prokurorluq, Dövlət Təhlükəsizliyi Xidməti, Müdafiə Nazirliyi və Daxili İşlər Nazirliyi bir qrup hərbçinin Ermənistana casusluq etdiyinə görə həbs edilməsi barədə məlumat yayıb.

İctimaiyyət 2017-ci ilin may-iyun aylarında saxlanılanların kütləvi işgəncələrə məruz qalmasından 2019-cu ildə xəbər tutub.

Hüquq müdafiəçilərinin məlumatına görə, 100-dən çox əsgər və zabit işgəncələrə məruz qalıb, 25 nəfər uzun müddətə azadlıqdan məhrum edilib, 9 nəfər isə işgəncələrdən ölüb. Şahid ifadələrinə, məhkəmə-tibbi ekspertizanın materiallarına görə, müttəhimlər ağır işgəncələrə məruz qalıblar.

Ölənlərin yaxınlarının çoxsaylı etirazlarından və hüquq müdafiəçilərinin tələblərindən sonra hakimiyyət əsassız təqib faktlarını etiraf edib və məhkumların işlərinə yenidən baxmağa məcbur olub.

İndiyədək hakimiyyət casusluğa dair sübutları və konkret faktları təqdim etməyib. Güc strukturları rəhbərliyindən heç kim cəzalandırılmayıb və günahını etiraf etməyib.