Uzun müzakirələrdən sonra Azərbaycan sülh sazişindən "Zəngəzur dəhlizi" ilə bağlı müddəanı çıxarmağa razılıq verib

Azərbaycan hərbçiləri təxminən bir ay əvvəl demarkasiya edilmiş Berkaber-Qızılhacılı bölgəsindən geri çəkilib.

Bu barədə Berkaber kəndinin icma başçısı Tiqran Arutyunyan Ermənistanın “News.am” xəbər agentliyinə məlumat verib.

“Təxminən iyul ayının ortaları idi. İndi bu ərazidə erməni sərhədçiləri var”, - deyə Arutyunyan bildirib.

Azərbaycan tərəfi hələlik bununla bağlı heç bir açıqlama verməyib.

Bu arada, Ermənistan Azərbaycanla sülh sazişi layihəsindən regional nəqliyyat əlaqələrinin bloklanmasına dair müddəanın “qarşılıqlı razılıq əsasında” çıxarıldığını təsdiqləyib.

“Biz vurğulamalıyıq ki, blokun effektiv şəkildə açılması Ermənistan Respublikasının və onun təşviq etdiyi gündəmin nəzərdə tutduğu kimi, regionda sülh və iqtisadi inkişaf üçün həlledici element olaraq qalır. Bu, Ermənistan hökumətinin təqdim etdiyi, suverenliyə və yurisdiksiyaya hörmət, qarşılıqlılıq və bərabərlik kimi tanınmış prinsiplərə əsaslanan “Sülh yollarının kəsişməsi” proqramında öz əksini tapıb”, - Ermənistan Xarici İşlər Nazirliyinin sözçüsü Ani Badalyan avqustun 7-də Azadlıq Radiosunun Ermənistan xidmətinə bildirib.

Bundan əvvəl Azərbaycan prezidenti İlham Əliyevin xüsusi tapşırıqlar üzrə nümayəndəsi Elçin Əmirbəyov Azadlıq Radiosuna müsahibəsində bildirib ki, Bakı və Yerevan Azərbaycanı onun Qərb anklavı olan Naxçıvana birləşdirən “Zəngəzur dəhlizi” ilə bağlı “qarşılıqlı məqbul variant” tapıblar.

“Biz başa düşdük ki, əgər konstitusiya problemi ilə yanaşı, kommunikasiya xətlərinin yenidən açılması mövzusu da bizi əngəlləsə, yaxın gələcəkdə sülh sazişi bağlaya bilməyəcəyik. Beləliklə, qarşılıqlı razılaşma əsasında bu bəndi sülh sazişindən çıxarmaq və sonrakı mərhələyə keçmək qərarına gəldik”, - deyə Əmirbəyov bildirib.

“Sülh sazişi imzalandıqdan sonra hər iki ölkənin nümayəndə heyəti Azərbaycanın əsas hissəsi ilə Naxçıvan arasında kommunikasiya xətlərinin yenidən açılmasının qarşılıqlı məqbul formulunu tapmaq üçün müzakirələri bərpa etmək istəyə bilər”, - o əlavə edib.

Rəsmi Yerevan uzun müddətdir ki, potensial yolun ekstraterritorial xarakterini nəzərdə tutan “dəhliz” ifadəsinə etiraz edir. Ermənistan israr edir ki, hər iki ölkə öz ərazilərindən keçən nəqliyyat əlaqələri üzərində yurisdiksiyanı saxlamalıdır. Bundan əlavə, Ermənistan iddia edir ki, nəqliyyat əlaqələrinin yenidən açılması daha geniş regional blokun açılması kontekstində baş verməlidir. Bu da Ermənistanın Naxçıvan üzərindən İrana dəmir yolu çıxışını və Türkiyə ilə açıq sərhədi əhatə edəcək.

Ermənistan və Azərbaycan iki ildən çoxdur ki sülh sazişinin mətni üzərində işləyirlər. Qərb dövlətləri, o cümlədən ABŞ və Avropa İttifaqı son otuz ildə Qarabağ regionu uğrunda bir neçə müharibə aparan iki Cənubi Qafqaz ölkəsini sazişi tezliklə yekunlaşdırmağa çağırıb. Azərbaycan isə təkid edir ki, sülh sazişi imzalanmadan əvvəl Ermənistan Qarabağın Ermənistana birləşdirilməsi ilə bağlı istinadları öz Konstitusiyasından çıxarmalıdır.