ABŞ prezidenti Donald Tramp İsrail və Livan arasında 10 günlük atəşkəs barədə razılaşma əldə olunduğunu açıqlayıb. Vaşinqtonun vasitəçiliyi ilə hazırlanmış sənədin bu gün - aprelin 17-si qüvvəyə minəcəyi gözlənilir

ABŞ Dövlət Departamenti İsrail və Livan arasında müvəqqəti atəşkəsə dair razılaşmanın mətnini yayımlayıb. Sənədə əsasən, atəşkəsin bu gün - aprelin 17-də qüvvəyə minməsi və 10 gün davam etməsi nəzərdə tutulur.

Razılaşmada qeyd olunur ki, tərəflər iki ölkə arasında dayanıqlı sülhün təmin olunması, qarşılıqlı suverenlik və ərazi bütövlüyünün tanınması, həmçinin ortaq sərhəddə real təhlükəsizlik mühitinin yaradılması istiqamətində çalışacaqlar. Eyni zamanda, İsrailin özünümüdafiə hüququnun qorunacağı vurğulanır.

Sənədə görə, tərəflər Livanın suverenliyini zəiflədən və regional sabitliyə təhlükə yaradan qeyri-dövlət silahlı qruplaşmaların fəaliyyətinin məhdudlaşdırılmasını planlaşdırır. Bu çərçivədə Livan ərazisində silah daşımaq hüququnun yalnız ölkənin rəsmi təhlükəsizlik qüvvələrinə məxsus olması məqsəd kimi göstərilir.

İsrail və Livan həmçinin təsdiqləyir ki, formal olaraq müharibə vəziyyətində deyillər və ABŞ-nin vasitəçiliyi ilə birbaşa, vicdanlı danışıqlar apararaq uzunmüddətli təhlükəsizlik, sabitlik və sülhə nail olmaq niyyətindədirlər.

ABŞ isə öz növbəsində bildirir ki, İsrail planlaşdırılan, qaçılmaz və ya davam edən hücumlara qarşı istənilən vaxt özünü müdafiə etmək üçün zəruri addımlar atmaq hüququnu saxlayır və atəşkəs bu hüquqa mane olmamalıdır.

Razılaşmaya əsasən, müvəqqəti atəşkəs qüvvəyə mindikdən sonra Livan beynəlxalq dəstək ilə “Hizbullah” və digər qeyri-dövlət silahlı qruplaşmaların İsrailə qarşı hücum və düşmənçilik fəaliyyətlərinin qarşısını almaq üçün ciddi addımlar atacaq.

ABŞ prezidenti Donald Tramp daha əvvəl bildirib ki, tərəflər 14 apreldə 1993-cü ildən bəri ilk birbaşa danışıqları apardıqdan sonra 10 günlük atəşkəs barədə razılığa gəliblər.

İsrail və Livan 1948-ci ildə İsrail dövlətinin yaranmasından bəri formal olaraq müharibə vəziyyətində qalır. Livan İsraili dövlət kimi tanımır.