Ermənistanın Baş naziri Nikol Paşinyan yaxın gələcəkdə Ermənistan və Azərbaycan arasında işgüzar əlaqələrin qurulacağını bildirib və bunu iki ölkə arasında sülhün institusional möhkəmlənməsi üçün əsas vasitələrdən biri kimi qiymətləndirib

Ermənistanın Baş naziri Nikol Paşinyan hesab edir ki, yaxın perspektivdə Ermənistan və Azərbaycan arasında işgüzar əlaqələr formalaşacaq. Onun sözlərinə görə, bu, iki ölkə arasında sülhün institusional əsaslarla möhkəmləndirilməsində mühüm rol oynayacaq.

“Armenpress”in məlumatına görə, Paşinyan bu fikirləri hakim “Vətəndaş Müqaviləsi” partiyasının Ermənistan-Azərbaycan münasibətlərində sülhün institusionallaşdırılmasına dair seçki proqramını təqdim edərkən səsləndirib.

Proqrama əsasən, sülhün institusionallaşdırılması prosesi 2024-cü ildə Ermənistanın Tavuş vilayətində dövlət sərhədinin delimitasiyası ilə başlayıb. Daha sonra Ermənistan və Azərbaycan arasında delimitasiya komissiyalarının birgə fəaliyyəti haqqında əsasnamənin imzalanması və ratifikasiyası ilə davam edib. 2025-ci ilə qədər bu proses sülh və dövlətlərarası münasibətlərin qurulmasına dair sazişin paraflanması, eləcə də Vaşinqton bəyannaməsi ilə sülh prinsipləri və nəqliyyat infrastrukturunun açılması istiqamətində razılaşmalarla inkişaf etdirilib.

Paşinyan bildirib ki, bu proses artıq hüquqi baxımdan məcburi əsaslara malikdir. O qeyd edib ki, sərhədlərin delimitasiyası üzrə dövlət komissiyalarının birgə fəaliyyəti haqqında sənəd hər iki ölkədə ratifikasiya olunaraq hüquq sistemlərinin ayrılmaz hissəsinə çevrilib.

Baş nazirin sözlərinə görə, həmin sənəddə delimitasiya prosesinin əsas prinsipinin Alma-Ata bəyannaməsinə söykəndiyi təsbit olunub. Bu isə müstəqil Ermənistanın ərazisinin sovet dövründəki Ermənistanın, Azərbaycanın isə sovet dövründəki Azərbaycanın ərazisi ilə eyniliyinin tanınması deməkdir.

Paşinyan sülhün institusionallaşdırılması üçün növbəti addımları da açıqlayıb. Bunlara sərhədlərin delimitasiyasının davam etdirilməsi, 2025-ci il 8 avqust tarixli Vaşinqton bəyannaməsinə uyğun olaraq TRIPP layihəsinin həyata keçirilməsi, regional nəqliyyat yollarının tam açılması, həmçinin Ermənistan və Azərbaycan arasında sülh və dövlətlərarası münasibətlər haqqında sazişin yekun imzalanması və ratifikasiyası daxildir.

O qeyd edib ki, bu addımlar yekun deyil və əlavə tədbirlər də vacibdir. Paşinyan vurğulayıb ki, vətəndaş cəmiyyəti və biznes nümayəndələri arasında əlaqələrin qurulması, ikitərəfli ticarətin inkişafı, siyasi, mədəni və humanitar dialoq sülhün möhkəmlənməsi üçün əsas alətlərdəndir.

Baş nazir əlavə edib ki, bəzi istiqamətlər üzrə artıq ilkin nəticələr var. Onun sözlərinə görə, Ermənistan və Azərbaycan arasında ticarət əlaqələri kiçik addımlarla formalaşır, vətəndaş cəmiyyəti nümayəndələri arasında təmaslar isə konkret mərhələyə qədəm qoyub.

“Ümid edirəm və əminəm ki, yaxın gələcəkdə işgüzar əlaqələr də qurulacaq. Bu, sülhün institusionallaşdırılmasının ən vacib vasitələrindən biridir”, – deyə Paşinyan bildirib.