"PAŞA Bank" ASC 2020-ci ili 84,252 milyon manat xalis mənfəətlə başa vurub. Bu haqda bankın illik maliyyə hesabatında deyilir. Hesabata görə bu, 2019-cu ilə nisbətən 29,5% çoxdur. Ötən il "PAŞA Bank"ın əməliyyat gəlirləri 313,395 milyon manat (illik müqayisədə 14,9% çox), əməliyyat xərcləri 188,945 milyon manat (15,4% çox), xüsusi ehtiyatlara ayırmaları 11,537 milyon manat (2,3 dəfə az), gözlənilməz gəlirləri 107 min manat (əvvəlki il zərər olub), mənfəət vergisi ödəmələri isə 28,768 milyon manat (64,5% çox) təşkil edib. Bu il yanvarın 1-nə "PAŞA Bank"ın aktivləri 5 513,021 milyon manat olub ki, bu da 1 il əvvələ nisbətən 15,6% çoxdur. Bunun 2 060,484 milyon manatı müştərilərə verilmiş xalis kreditlərdir. Son 1 ildə Bankın kredit portfeli 17,5% böyüyüb. Hesabat dövründə "PAŞA Bank"ın öhdəlikləri 15,8% artaraq 4 971,876 milyon manata, o cümlədən depozit portfeli 12% artaraq 4 014,761 milyon manata, balans kapitalı isə 13,7% artaraq 541,145 milyon manata, o cümlədən nizamnamə kapitalı 6,5% artaraq 354,512 milyon manata çatıb. Xatırladaq ki, "PAŞA Bank" 2007-ci ildə yaradılıb. Bankın səhmlərinin 56,8%-i "PAŞA Holdinq" MMC-yə, 28,2%-i "Ador" MMC-yə, 15%-i isə Arif Paşayevə məxsusdur.