Azərbaycanda ümumtəhsil məktəblərində “TikTok” sosial şəbəkəsinə çıxış bloklanıb.
“APA”nın məlumatına görə, bu barədə Milli Məclisin İnsan hüquqları, Ailə, qadın və uşaq məsələləri, Hüquq siyasəti və dövlət quruculuğu komitələrinin birgə iclasında “İnformasiya, informasiyalaşdırma və informasiyanın mühafizəsi haqqında” qanun layihəsinin müzakirəsi zamanı elm və təhsil nazirinin müavini Firudin Qurbanov məlumat verib.
Nazir müavininin sözlərinə görə, məktəblərdə ümumilikdə internet resurslarına çıxış müəyyən məhdudiyyətlərlə tənzimlənir. O bildirib ki, terrorizm və digər təhlükəli məzmunları əhatə edən 200-dən artıq mövzu üzrə internet resurslarına giriş məhdudlaşdırılıb.
Firudin Qurbanov qeyd edib ki, həyata keçirilən tədbirlərin əsas məqsədi uşaqların sağlamlığının və psixoloji vəziyyətinin qorunmasıdır. Onun sözlərinə görə, müxtəlif araşdırmalar sosial şəbəkələrdən həddindən artıq istifadənin uşaq və yeniyetmələrin psixi sağlamlığına mənfi təsir göstərdiyini ortaya qoyur.
Nazir müavini bildirib ki, bir sıra ölkələrdə uşaq və yeniyetmələrin sosial şəbəkələrə çıxışının qanunvericilik səviyyəsində tənzimlənməsi istiqamətində addımlar atılıb. Bu sahədə Avropa ölkələri, ABŞ və Çin təcrübəsi nümunə göstərilib. Qurbanovun sözlərinə görə, Çində tətbiq olunan məhdudiyyətlər nəticəsində uşaqların ekran qarşısında keçirdiyi vaxtın 10 faizdən çox azaldığı müşahidə olunub.
O, eyni zamanda, bu sahədə nəzarət mexanizmlərinin tətbiqinin çətinliklərindən də danışıb. Bildirib ki, yeniyetmələr bəzi hallarda tətbiq olunan məhdudiyyətləri aşmağın yollarını tapa bilirlər. Nazir müavini Avstraliyada sosial şəbəkələrə qoyulan məhdudiyyətlərlə bağlı yeniyetmələrin Ali Məhkəməyə müraciət etdiyini xatırladaraq, müxtəlif ölkələrdə bu istiqamətdə fərqli yanaşmaların mövcud olduğunu vurğulayıb.
Qurbanov əlavə edib ki, Elm və Təhsil Nazirliyi məktəblərdə təhlükəsiz rəqəmsal mühitin formalaşdırılması məqsədilə internet resurslarına müəyyən məhdudiyyətlərin tətbiqini davam etdirir.
Təhsil məsələləri üzrə ekspertlər hesab edirlər ki, məktəblərdə sosial şəbəkələrə çıxışın məhdudlaşdırılması dərs prosesində diqqətin yayılmasının qarşısını almaq və kibertəhlükələrdən qorunmaq baxımından müsbət addımdır. Onların fikrincə, xüsusilə məktəb şəbəkələri üzərindən əyləncə yönümlü platformalara girişin məhdudlaşdırılması tədris mühitinin səmərəliliyini artıra bilər.
Psixoloqlar isə sosial şəbəkələrdən həddindən artıq istifadənin uşaqlarda diqqət dağınıqlığı, yuxu pozuntuları və asılılıq riskini artırdığını bildirirlər. Bununla belə, mütəxəssislər yalnız texniki qadağaların kifayət etmədiyini, uşaqların rəqəmsal savadlılığının artırılması, valideyn nəzarətinin gücləndirilməsi və təhlükəsiz internet istifadəsi ilə bağlı maarifləndirmə tədbirlərinin də vacib olduğunu vurğulayırlar.
İKT sahəsi üzrə mütəxəssislər də məktəb daxilində tətbiq edilən məhdudiyyətlər müəyyən nəticə versə də, şagirdlərin mobil internet vasitəsilə bu qadağaları asanlıqla keçə bildiyini düşünürlər. Onlar uzunmüddətli həll yolu kimi qadağalarla yanaşı, məsuliyyətli rəqəmsal davranış vərdişlərinin formalaşdırılmasının daha effektiv olacağını hesab edirlər.